Ер төстіктей батырлар
Дата: 25.06.2024 Рубрика: Патриот
0
![](/usertpl/i/views.png)
![](/usertpl/i/comments.png)
![Ер төстіктей батырлар](/userfiles/item/3252/fullimage1.jpg)
Тобыл қаласының мәдениет үйінде Аудандық балалар кітапханасының ұйымдастыруымен 7 мамыр отан қорғаушылар күніне орай «Ұлттық рухани жаңғыру» жобасы аясында «Ер төстік» батырлар тартысы өтті. Сайыс мектепке дейінгі білім беретін ұйымдар арасында өткізілді. Сайысқа «Ер төстіктей» батыр боламын деген төрт бүлдіршін қатысты.
Сайысымыздың қадірлі қонағы Қостанай ауданы әкімінің орынбасары Әбішев Қайрат Тынымбайұлы алғы сөз сөйлеп, сынға түскелі отырған кішкентай батырларымызға сәттілік тіледі.
«Жеті атасын білген ұл, жеті жұрттың қамын жер» демекші, алдымен батырларымыз өздерін таныстырып, жеті атасын айтып жарысты. Одан соң «жігітке жеті өнерде аз» деп аталатын кезеңде ұлдарымыз бірінен бірі кем түспеді, бірі әкесіне арнап ән шырқаса, бірі асық биін билеп енді бірі «Ер төстік» ертегісі желісі бойынша би-қойылымын көрсетіп ,тағы бір қатысушымыз Кенен Әзірбаевтың «Ер төстік» аңызын жатқа айтып көрермендерді өнерлерімен таңқалдырды. Атадан балаға мұра болып келе жатқан бойындағы бар өнерлерін паш етті. Сайыстың көркі асық ату, қол күресі кезеңдерінде қыза түсті. Бұл екі кезеңде кішкентай батырлар өздерінің ептіліктерін, мергендіктерін барынша көрсете білді. Жігіттер аттарына заттары сай шетінен өнерлі, шымыр болып өсіп келе жатқандықтарын көрсетті.
Сондай-ақ жас әншілер Дәрмен Камила және «Карамельки» тобының әншілері мерекені әнмен әрлеп сайыстың көркін қыздыра түсті. Бұндай сайысты ұйымдастырудағы мақсатымыз тәрбие тал бесіктен демекші мектеп табалдырығын аттамаған бүлдіршіндерге ұлтының мәдениетін және ана тілін құрметтеуге тәрбиелеу. Оларға қазақ халқының көзінің қарашығындай сақтап, ұрпақтан-ұрпаққа жалғап бүгінге дейін аман-есен алып келген ата-бабамыздың құндылығын әр ұрпақтың жадында қалдыруымыз қажет. Сан ғасырлар бойы күмбірлеген күйі, әуелеген әуезді әні, асқақтаған айтысы, таңды таңға ұрған эпостық жырлары, шешімі шебер шешендік сөздері, мақал-мәтелі мен жұмбағы, жаңылтпашы мен өтірік өлеңі, ең бастысы, қасиетті тілі біз үшін баға жетпес асыл қазына.
Қазіргі заманда ұрпақтың бойына қайырымдылықтың, ізгіліктің дәнін сепсек деп ойлаймыз. Ал оның барлығы ұлттық тәрбиемізден бастау алатыны сөзсіз. Бұл сайыстың өскелең ұрпаққа берері мол деп білеміз. Мысалы қазақтың ұлттық ойыны асық ату балаларды шапшаңдыққа, ептілікке, мергендікке баулиды және қырағылығын жетілдірсе, қол күресі балалардың нық басып, орнықты жүруін жетілдіреді.
Бір сөзбен айтқанда сайыс өте қызықты, тартымды, жоғары деңгейде өтті. Бірінен-бірі озып тұрған сайыпқырандарымызды бағалап, саралау әділқазылар алқасына оңай соқпағаны сөзсіз. Дегенмен жүйрік жүлдесіз қалмайды дегендей барлық сындардан сүрінбейөтіп, оқ бойы оза шауып, ерекше көзге түскен Ерланұлы Тәуекел – бас жүлдені жеңіп алып «Ер төстік» батыр атанды.
«Алтын бесік» бөбекжайының тәрбиеленушісі Нұрлан Нұрмұхамбет – «мерген жігіт» номинациясы бойынша марапатталды. «Гүлдер» бөбекжайының тәрбиеленушісі Мейрамхан Азиз – «шымыр жігіт» номинациясын иеленді. Ал «Сәулетай» бөбекжайының тәрбиеленушісі Асқарбек әли – «өнерлі жігіт» номинациясын қоржынына салды.
Сондай-ақ «Ерекше ұлттық костюм» арнайы сыйлығы «Гүлдер» бөбекжайының тәрбиеленушісі Мейрамхан Азизға бұйырды. Барлық қатысушылар арнайы дипломдармен және сыйлықтармен мараппатталды.
Әсемгүл Файзолла,
Қостанай аудандық орталық балалар кітапханасының кітапханашысы
Қостанай облысы, Тобыл қаласы
Комментарии