Кітапханадағы бір күн
Дата: 04.02.2025 Рубрика: Почитай-ка
0
110
0
Оқуға деген қоғамдық қызығушылықты арттыру, кітапханаға жаңа оқырмандарды тарту, кітапхана жұмысының шарттарымен, бүгінгі кітапхананың шексіз қызметімен таныстыру мақсатында Садчиков модельді ауылдық кітапханасында «Шекарасыз кітапхана» атты ашық есік күні өтті.
Іс-шара барысында келген қонақтармен жалпы оқырман қауымға қызықты және танымды акция алаңдары ұйымдастырылды: «Бір ел – бір кітап» акциясы аясында ұйымдастырылған көрмеде проза жанры бойынша көпшілік дауыспен ұлтымыздың көрнекті жазушысы, ақын, сыншы, аудармашы, суреткер Тәкен Әлімқұловтың шығармаларын оқу ұсынылғаны, поэзия жанры бойынша мемлекеттік сыйлықтың иегері, көрнекті ақын, биыл 90 жылдық мерейтойы аталып өтетін Жұмекен Нәжімеденовтың шығармалары таңдалғаны туралы айтылды. Сол сияқты, «Атаулы күндер» айдары бойынша мерейгер жазушылар мен кітаптардың көрмесін тамашалауға мүмкіндік болды. Көрменің «Шерлі жылдар шежіресі» деген сөресінен әйгілі «Қазақ» газетінің 1913-1918 жылдарды толық қамтитын 7 томы, «Айқап» журналының 1911 және 1912 жылдардағы қос жинағы, 1917- 1919 жылдары Семейде шығып тұрған «Сарыарқа» газетінің басылымдарын көруге мүмкіндік туды.
«Мерейгер кітаптар» атты кітап көрмесінде шыққанына 135 жыл болған Абайдың «Қара сөздері», 160 жылдық тарихы бар «Қозы Көрпеш Баян Сұлу», 110 жыл бұрын жазылған С.Торайғыровтың «Кім жазықты?» романы, сол сияқты орыс тіліне аударылғанына 155 жыл толған «Ер Тарғын» дастаны, А.С.Пушкиннің 205 жыл бұрын жазылған «Руслан и Людмила» поэмасы оқырмандар назарына ұсынылды.
Ашық есік күніне келген ауыл тұрғындары III облыстық «#ОқыЖәнеЖең» онлайн кітап оқубайқауы басталатыны туралы хабардар етілді, әрбір тұрғынының кітап оқып қана қоймай, ол үшін 50000-нан 150000 теңгеге дейін ақшалай сыйлықтар алуға мүмкіндігі бар екенін, байқау қазақ және орыс тілдерінде үш жас санаты бойынша өткізілетіні туралы түсіндірілме жұмысы жүргізілді.
«Ұлттық өнер – ұрпаққа мұра» айдарымен қолөнер көрмесі ұйымдастырылды. Көрменің мақсаты – жас ұрпаққа қазақ халқының ұлттық қолтаңбасын, өнерін, салт-дәстүрін дәріптеу, мақтаныш ету. Ұлттық өнер – халқымыздың қолданбалы өнерінің ең биік жетістіктерінің бірі. Осы уақытқа дейін күнделікті тіршілікте қолданылып келген түрлі ою-өрнектер, әшекей бұйымдар – талай ұрпақтың ақыл-ойының жемісі екені насихатталды.
Сонымен қатар, әшекей бұйымдар жасау бойынша шеберлік класы өткізілді. Ал қазыналы әжелер болса, өз тараптарынан қыз балаға қатысты әшекей бұйымдарына шолу жасап, олардың мағынасын, тәрбиелік мәнін түсіндіріп берді, атап айтар болсақ, шекелік, шашбау, шолпы жайында, Оны қыздар өрілген шаштың ұшына тағатынын, ал шашбауды шашпен бірге өріп, бұрымды қалың, сәнді етіп көрсету үшін қолданатыны туралы түсінік берді.
«Ашық есік күні» аясында ең белсенді кітапхана оқырмандары Алғыс хатпен марапатталды. Атап айтар болсақ: А.Охотников, Т.Новичкова, С.Бекмағамбетов, Г.Искакова, Н.Старовик, П.Дельхман, А.Сторожук, Н.Диль, Н.Шерудило.
Бүгінгі таңда кітапхана жанынан құрылған үш клуб жұмыс істейді: «Истоки», «Қазына», «Почемучка». Аталмыш күні жас ұрпақты ұлттық құндылықты ұлықтауға баулу, отбасылық тәрбиенің озық тәжірибесін насихаттау, өскелең ұрпақты ұлттық салт-дәстүрлер негізінде тәрбиелеу, ұрпақтар сабақтастығын сақтау және нығайту, аға буынға құрмет көрсетуге тәрбиелеу, өнерге баулу мақсатында бастауыш және орта буын сынып оқушыларынан құралған «Өркен» клубының тұсауы кесілді.
«Истоки» клубының мүшелері келген қонақтарға әртүрлі шөптен жасалған шайларын ұсынып, олардың пайдасы жайында, шөпті шайды қалай кептіретіні туралы айтып берді.
Іс-шара соңында ауыл зейнеткерлерінен құралған «Қазына» клубының мүшелері «Кешір мені, Ана!» атты отбасылық тәрбиелік мәнге ие сахналық қойылымды көпшіліктің назарына ұсынды. Мұндағы мақсат – ата-ананы қадірлеу, саналы ұрпақты тәрбиелеуде рухани құндылықтардың мәні зор екендігіне тағы бір мәрте назар аудару, барлық адам баласы ана алдындағы парызын өтеп, ақ сүтін ақтап, ананың шашына ақ түсірмей, Ана деген қасиетті тұлғаны бақытты ету керек екенін насихаттады. Туған баласы анасын қадірлемей, қарттар үйіне тапсырып, өмірлерін сағыныш пен мұң-налаға толғанын, бір мезет болсын балаларының жүзін көріп, мауқын басу үшін құшағына алуды аңсаған қарттардың кейпін сомдағандарын көрген көрермендер ішінде елжіремеген жүрек қалмады, қойылымды тамашалап отырған көрермендер көз жасына ерік берді.
Сөз соңында бейбіт елімізді жырға қосып бір ел болса, біздей болсын, -деп ұрандатып, аудандық, облыстық, республикалық додаларда бой көрсетіп үлгерген «Қазыналықтарды» қошеметпен ортаға шақырып, олар өз тарапынан «Қазыналы қарттарым» атты әнін тарту етті.
Алтын Ержанова,
Садчиков модельді ауылдық
кітапхана меңгерушісі.
Комментарии
