«Оқы және өзгеге ұсын!»

Қостанай ауданы, Айсары жалпы білім беретін мектебінің кітапханасы үлкен, жарық. Мектебіміздің кітапхана меңгерушісі Мейрамкүл Көшек үнемі кітаптар арқылы насихат жүргізіп, ақын-жазушылар, мереке, атаулы күндер жайында кітаптар көрмесін ұйымдастырып, тәрбие жұмыстарын жиі өткізіп тұрады. М.Базарқызы өз жұмысына мығым, ұқыпты, әрқашан да ізденіс үстінде. Бұл ісіне ата-аналар, ұстаздар қауымы, оқушылар да дән риза. Оқушыларды еліне, жеріне деген сүйіспеншілігін, отаншылдығын, адамгершілігін арттырып, халқымыздың қилы тарихын, әдет-ғұрпын, салт-дәстүрін, мәдени мұраларын түсіне білуіне бастайды.

Қазақстанның тұңғыш Елбасы Н.Ә. Назарбаевтың «Болашаққа бағдар: рухани жаңғыру» атты мақаласын жүзеге асыру аясында кітапхана меңгерушісі Мейрамкүл Көшектің ұйымдастыруымен мектеп кітапханасында оқушылар мен мұғалімдер арасында кітап оқуды насихаттау, кітап оқуға деген қызығушылығын арттыру, рухани мәдениетін көтеру мақсатында «Оқы және өзгеге ұсын!» атты буккроссинг жобасы өткізілді.

Жобаға жылда қатысатын ата-аналар қазіргі заман жағдайына байланысты қатыса алмады. Жобаның негізгі мақсаты – мектеп кітапханасындағы кітаптар қорын молайту және байыту, өзара кітаптар алмасу. Сонымен қатар игі іс жасау, әр оқырман өздерінің қолында бар сүйіп оқыған кітаптарын басқа оқырмандармен бөлісіп, оларға да түрлі жанрдағы кітаптарды оқуға мүмкіндік беру. Жобаның ерекшелігі ешқандай оқырманға формуляр ашылмайды, қайта акцияға берілген кітапты алған оқырман өзінің кітапқа қаншалықты жауапты екенін сезінеді. Оқыған кітаптарын кері қайтарып басқа кітаптармен алмасуы оқырманның жауапкершілігі болып табылады. «Буккроссинг» қозғалысы кітап пен оқырман арасын жақындатудың тиімді жолы ретінде тәжірибеге енгізіліп отыр. Кез-келген адам оқыған қызықты кітаптарын буккроссинг сөрелеріне қойып, орнына сол сөреден өзі оқымаған кітапты алуы арқылы достарымен бөліседі. Буккроссингтің ұраны – «Барлық әлемді кітапханаға айналдырамыз». Кез-келген ұнаған кітапты ал да, оқы! «Қауіпсіз сөреде» кітаптар кітапханада тіркелмеген, сол себепті кітапты өзіңмен бірге алып кетпе: оқып болып басқаларға қалдыр. Кітаптың өмірі қысқа, сондықтан ұқыпты болуларыңызды өтінемін. Сөреде сенің сүйікті кітабың болмаса, оны өзің әкеліп қос. Сіздер басқаларға оқуға ұсынғыңыз келген кітаптарды таңдау үшін үйлеріңіздегі кітаптар сөресінен кітапты алып «Қауіпсіз сөреге» қоясыздар. Ол жерден сіз жаныңызға жақын кітапты таңдап аласыз да оқығаннан кейін досыңызға оқуға бересіз немесе «Қауіпсіз сөреге» қайтадан апарып қоясыз. Маңыздысы: «Кітаптар кеңістікте саяхаттап жүреді, бір қолдан басқа қолға түседі де өмір сүруін ірі қарай жалғастыра береді. Әлемге өзіңнің сүйікті кітаптарыңды тарат, өзіңе ұнамайтын кітаптарды өз оқырмандарыңа ұсын!» делінген жоба ережелері де ескертілді.

-Кітап оқу рухы биік, мәдениеті жоғары, көзқарасы айқын, ұлтжанды тұлғаны қалыптастырады. Жобаға өз үлестерін қосқан жандар көп болды. Оқушылар өздерінің оқыған кітаптарынан үзінді айтты. Өздерінің құрбыларын кітап оқуға ынталандырып, көркемсөз оқығандар да болды. Мұндай жобаға біздің алғысымыз шексіз, - дейді қазақ тілі мен әдебиеті пәні мұғалімі Дариға Берсүгірова.